चन्द्रौटा,कपिलवस्तु ।
कपिलवस्तु क्षेत्र नं. ३ को चुनावी माहोलमा यतिबेला चिन्दा परियारको नाम उल्लेखनीय रूपमा अगाडि आएको छ। कुनै राजनीतिक दलको छायाँमा नरही, स्वतन्त्र उम्मेदवारका रूपमा उनी जनताको विश्वास जित्दै राजनीतिक मैदानमा उदाएका छन्। पेसाले बौद्धिक पत्रकार रहेका परियार लामो समयदेखि सत्य, न्याय र जनसरोकारका विषयमा निर्भीक रूपमा कलम चलाउँदै आएका छन्।

झुपडीमा जन्मिएर गरिबी, विभेद र संघर्षका बीच हुर्किएका चिन्दा परियारले दलित, गरिब र सीमान्तकृत समुदायको पीडालाई किताबमा होइन, आफ्नै जीवनमा अनुभूत गरेका छन्। यही जीवन भोगाइले उनलाई जनताको पक्षमा उभिने साहसिलो नेताका रूपमा स्थापित गरेको छ। पत्रकारितामार्फत सत्ताका कमजोरी उजागर गर्दै आएका परियार आज त्यही सत्तालाई जनताको कठघरामा उभ्याउन चुनावी प्रतिस्पर्धामा उत्रिएका हुन्।

उनको चुनावी अभियान भाषणमुखीभन्दा व्यवहारमुखी देखिन्छ। घरदैलो अभियान, प्रत्यक्ष संवाद र जनसमस्याप्रति गहिरो चासोले मतदातामा आशा र भरोसा बढाएको छ। एक स्थानीय वृद्ध मतदाताले भने, “उहाँले हाम्रो जीवन देख्नुभएको छ, त्यसैले उहाँ हाम्रो पीडा बुझ्नुहुन्छ।”

पुराना अनुहार र दोहोरिएका वाचाबीच चिन्दा परियार नयाँ सोच, सफा राजनीति र जवाफदेहिताको प्रतीक बनेका छन्। कपिलवस्तु–३ मा उनको उदयले गरिब र भुइँमान्छेको आवाज संसदसम्म पुग्न सक्छ भन्ने विश्वास बलियो बन्दै गएको छ।