काठमाडौँ । जनता समाजवादी पार्टीले हालै जारी गरेको विज्ञप्तिको एक अंशप्रति प्रधानमन्त्री सचिवालयको गम्भीर ध्यानाकर्षण भएको छ ।
प्रधानमन्त्रीप्रति लक्षित विज्ञप्तिमा केपी ओली सरकारको कुनै ठोस कार्ययोजना नरहेको र प्रधानमन्त्री शारीरिक र मानसिक दृष्टिले अत्यन्तै कमजोर रहेको भन्ने अशिष्ट र पूर्वाग्रही टिप्पणी अत्यन्त दुराशयपूर्ण र खेदजनक रहेको प्रेस सल्लाहकार सूर्य थापाले बताएका छन् ।
थापाले एक वक्तव्य जारी गर्दै भनेका छन् ,‘पटक पटक राज्यका जिम्मेवार तहमा रहिसकेका र प्रधानमन्त्रीको समेत जिम्मेवारी सम्हालिसकेका आफूलाई सुशिक्षित भनेर चिनाउन रुचाउनेहरू संलग्न दलबाट यस स्तरको तरिका खासमा कुण्ठाग्रस्त गालीगलौज मात्र हो र सोचको दिवालियापन नै हो ।’
उनले राजनीतिमा विवाद, मतभेद र असहमतिहरू हुने गरे पनि स्वाभाविक नै मानिने बताएका छन् । ‘त्यसै आधारमा यस स्तरको अपसंस्कारको प्रदर्शनबाट कहाँ पुगिन्छ ? सम्बन्धित व्यक्ति र पक्षहरूले नै हेक्का राख्नु श्रेयष्कर होला’ उनले जारी गरेको वक्तव्यमा भनिएको छ ।
‘सिद्धान्त, नीति र कार्यक्रममा बहस गर्न नसक्ने निरुपाय व्यक्तिहरू नै आफ्नो स्वार्थका रोटी सेक्न नपाउँदा ऑंखा चिम्लेर अँध्यारो देख्छन् र उज्यालोको भर्त्सनामा जुट्छन् ।’
प्रधानमन्त्री केपी शर्मा ओलीलाई आलोचना, विरोध र गालीगलौज गरिएको सन्दर्भ कुनै नौलो कुरा नभएको भन्दै आफ्नो निहित स्वार्थ पूरा गर्न प्रधानमन्त्रीलाई बाधक देख्नेहरूले विगत छ दशकयता यसो गर्दै आएको तथ्य स्पष्ट रहेको थापाद्वारा जारी गरिएको वक्तव्यमा भनिएको छ । उनले त्यस्ता तत्त्वहरू इतिहासको गर्तमा सीमित भइसकेका छन् र अरूबाट निर्देशित कदम, गलत नीति, विचार र व्यवहारले कोही कसैलाई सफलता हासिल हुँदैन भन्ने जगजाहेर रहेको बताएका छन् ।
‘शीशाको घरमा बसेर ढुङ्गा हान्नेहरू आफै असुरक्षित र पतन हुनु अनिवार्य छ । जागृति, चेतना, संस्कार र सदाचारका मानकहरू सम्बन्धित व्यक्तिअनुरूप नै व्यवहारमा अभ्यास गरिने र भिन्नाभिन्नै हुने यथार्थ हरेक समाजका सचेत व्यक्तिलाई अवगत नै रहिआएको छ ।
राजनीतिक दलहरूले आफ्ना धारणा र विमति प्रस्ट्याउने गरी सरकारको आलोचना र विरोध गर्न सक्छन् । तर राष्ट्रपति, प्रधानमन्त्री र जिम्मेवार पदाधिकारीविरूद्द प्रयोग गरिने अपमानजनक, तथ्यहीन, भ्रामक र गैर जिम्मेवार भाषाप्रति गम्भीर आपत्ति प्रकट गर्नैपर्छ । जो सभ्य समाजको मूल्य र मानक विपरीत रहेका छन् । तसर्थः जसपाको औपचारिक विज्ञप्तिमा प्रमप्रति प्रयोग गरिएको भाषा निन्दनीय रहेकोतर्फ सम्बन्धित सबैलाई स्पष्ट गर्दछु’ थापा द्वारा जारी वक्तव्यमा भनिएको छ ।
