लुम्बिनी प्रदेश सभा सदस्य विष्णु पन्थीले माधवकुमार नेपाल नेतृत्वको पार्टीको प्रभाव साविक लुम्बिनी अञ्चलमा शून्य रहेको टिप्पणी गरेका छन् । एमाले भित्र माधव पक्षधर रहेका पन्थीले जिल्लाको बुद्धभूमि नगरपालिकामा आयोजित एमाले निकट राष्ट्रिय युवा संघको कार्यक्रमलाई सम्बोधन गर्दै यस्तो बताएका हुन् ।
एमाले फुटिसकेपछि कतै नखुलेका पन्थी शनिबारबाट एमाले तिर खुलेका छन् । लामो समय देखि उनी माधव पक्षमा थिए । एमालेका युवा माझ सम्बोधन गर्दै उनले माधव नेपालले नयाँ पार्टी गठन गरेर गल्ति गरेको पनि बताए । पार्टी भित्र लामो समय देखि विवाद रहेको उल्लेख गर्दै त्यो विवाद एमाले फुटाउन नभई बनाउन भएर उनको तर्क थियो ।
‘एमाले भित्र विवाद भएकै हो । त्यो विवाद पक्कै एमाले फुटाउन नभई मिलाउन थियो उनले भने, नेपालले पार्टी फुटालेर गल्ति गर्नुभयो । लुम्बिनीमा नेपालको पार्टी शून्य स्थितिमा हुने छ । एमालेलाई खासै फरक पर्दैन् ।’
सांसद पन्थीले यो भनिरहदा एमाले कार्यकर्ताले ताली बजाएर समर्थन गरेका थिए ।
अझै कतिपय कार्यकर्ता अलमलमा परेको भन्दै उनले आफ्नो गल्ती स्विकार गरेर एमाले फर्कन सुझाए । ‘कतिपय कार्यकर्ता अझै भ्रममा छन् । उनीहरु भ्रममा पर्न हुँदैन् उनले भने, गल्ती रियलाइजेशन गरेर एमालेमा फर्कनुको विकल्प छैन् ।’
तत्कालिन नेपाल कम्युनिष्ट पार्टी (नेकपा) बाट पन्थी कपिलवस्तु अध्यक्ष बनेका थिए । पुस ५ गते तत्कालिन प्रधानमन्त्री केपी शर्मा ओलीले संसद विघटन गरेपछि नेकपा भित्र फुट देखा परेको थियो । पार्टी फुटे पछि दाहाल–नेपालले पन्थीलाई नेकपा कपिलवस्तुको अध्यक्ष बनाएका थिए । यद्यपि फाल्गुण २३ मा सर्वोच्च अदालतले नेकपा विघटन गरेपछि पन्थी एमालेमै थिए ।
एमाले भित्र चुलिएको विवादमा पन्थी अन्तिमसम्म माधव पक्षमै थिए । तर, माधवकुमार नेपालले नयाँ पार्टी गठन गरेसंगै यो समूहका युवा नेता एमाले तिर लागेका थिए । घनश्याम भुसाल निकट भनेर चिनिएका पन्थी भुसालले एमाले रोजेपछि उनीसंगै रहेका हुन् ।
०५४ सालमा नेकपा (एमाले) विभाजन हुँदा पन्थी नेकपा (माले) तिर लागेका थिए । एमाले र माले एकता पश्चात पन्थी एमाले राजनीतिमा लेखा आयोग सदस्यमा रहेर काम गरेका थिए । एमाले नवौं राष्ट्रिय महाधिवेशनमा माधवकुमार नेपाल प्यानलबाट केन्द्रीय सदस्यमा उठेका पन्थी झिनो मतले पराजित भएका थिए ।
