कमल बिष्ट , कपिलवस्तु सामुदायिक रेडियो भ्वाइस १०२.४ मेगाहर्ज चन्द्रौटाको समन्वयमा बाल विवाह न्यूनीकरणका लागि धर्मगुरु र सामाजिक अगुवा तथा किशोर किशोरी बीच अन्तरक्रिया ।
प्रमुख अतिथि समेत रहनुभएकी शिवराज नगरपालिकाकी उपप्रमुख शिवकुमारी थारुले बिगतका दिनहरुमा अभिभावकका कारण धेरै बालविवाह हुनेगरेको भएपनि पछिल्लो समय अभिभावकहरु सचेत बन्दै गएको बताउदै बालविवाह हुनुमा किशोर किशोरीनै किशोर अवस्थामा अपरिपक्व प्रेम सम्बन्धमा रहने र बिवाह गर्ने गरेकोमा हाल शिवराज नगरपालिका भित्र १८ वर्ष मुनिका ३३% किशोरीहरु सुत्केरी हुने डरलाग्दो अवस्था रहेको बताउनुभयो ।
अर्का अतिथि शिवराज नगरपालिका ५ नम्बर वडाका अध्यक्ष अर्जुनबहादुर पाण्डेले पछिल्लो समय प्रविधिको दुरुपयोगका कारण बालविवाहका घटना बढ्दै गएकोमा यसलाई नियन्त्रण गर्न अभिभावकहरु थप सचेत बन्नुपर्नेमा जोड दिनुभयो । कार्यक्रमका अध्यक्ष सरद अधिकारीले शिवराज ५ नम्बर वडा तुलनात्मक हिसावले सुगम रहेता पनि बालविवाह मुक्त हुन नसकेकोमा बाल अवस्थामा विवाह हुदा स्वास्थ्यमा जटिलता आउने मात्र होइन कानुनीरुपले समेत अपराध भएकाले उमेर नपुगी हुने विवाह र त्यस बाट जन्मने सन्तति लाई समेत असर पर्ने हुदा यसलाई रोक्न सबै तह र तप्काका नागरिकहरु लाग्नुपर्ने बताउनुभयो ।
नेकपा एमाले नगर कमिटी अध्यक्ष जगत पौडेलले धार्मिक कारणले हुने बालविवाहको न्यूनीकरणमा धर्मगुरुहरुले बालविवाह बिरुद्ध सचेतना फैलाउनुपर्नेमा जोड दिदै, राजनितिज्ञ, पत्रकार, समाजका हरेक सचेत नागरिक अभिभावकको पहलले मात्र यसको न्यूनीकरण गर्दै बालविवाह मुक्त समाज बनाउन सकिनेमा जोड दिनुभयो । शिवराज नगरपालिकाको सहयोगमा संचालित कार्यक्रम पालिकाको ४ स्थानमा सम्पन्न भएको छ, रेडियो भ्वाइसका अध्यक्ष शरद अधिकारीको अध्यक्षता, शिवराज नगरपालिकाकी उपप्रमुख शिवकुमारी थारुको प्रमुख आतिथ्यता, रेडियो भ्वाइसका संचालक समिति सदस्य सन्जीव गहतराजको स्वागत र स्टेशन प्रमुख गीता पौडेलको संचालनमा सप्पन्न भएको थियो ।
