जितपुर ४ नम्बर
नेकपाका अध्यक्षसमेत रहेका केपी शर्मा ओलीलाई नै सरकारमा निरन्तरता दिनुपर्ने माग गर्दै ओलीका समर्थकहरूले नाराबाजी गरेका छन्। शुक्रबार अपराह्न कपिलवस्तुको जितपुरमा जम्मा भएर ठूलो समूहमा नाराबाजी गरेका थिए । उनीहरूले ५ वर्षको स्थायी सरकारको लागि भनेर मतदान गरिएकाले अहिले नै केपी शर्मा ओलीलाई प्रधानमन्त्रीको पदबाट हटाउन नहुने भन्दै नाराबाजी गरेकाहुन् ।
नाराबाजीमा सहभागी भएकाहरूले वर्तमान सरकारलाई अस्थिर बनाउन भारतको इसारामा नेपालकै नेताहरू लागिपरेको आरोप लगाउँदै भारतबाट चलेकाहरूले व्यक्तिगत स्वार्थ पूरा गर्न कुर्सीको लडाइँमा लागेको दाबी गरेका छन्।
कोणसभामा नेकपा केन्द्रीय सदस्य टुकलाल गैरेले भारतले नेपालमाथि गरेको नाकाबन्दीको बेलामा ओली सरकार नझुकेको, प्रधानमन्त्री ओली आफ्नो कठिन स्वास्थ्य अवस्थाका बाबजुद पनि नेपाललाई विकासोन्मुख देशबाट विकसित देश बनाउन लागि परेको बताउनुभयो ।
उहाँले भारतले मिचेको नेपाली भूमिको वास्तविक नक्सा जारी गरेको, देशमा रेल र पानी जहाज चलाउन लागेको लगायतका कारण ओली नै सक्षम प्रधानमन्त्री भएकोले वर्तमान सरकार नरहे नेपालीको स्वाभिमान गुम्ने दावी गर्नुभयो ।
यस्तै जिल्ला कमिटि सदस्य तथा अनेरा स्ववियू पूर्व जिल्ला अध्यक्ष विकास आचार्यले भारतीय विस्तारवाद विरुद्ध सबै एकजुट हुन आग्रह गर्नुभयो । ओलीका समर्थकहरूले ‘केपी ओली जिन्दाबाद’, ‘आजलाई होइन भोलिलाई, ५ वर्ष ओलीलाई’, ‘स्थायी सरकार कायम गर’, ‘भारतीय दलाल मूर्दावाद’, ‘विदेशी हस्तक्षेप मुर्दावाद’, पार्टी स्थिरता कायम गर, लिम्पियाधुरा हाम्रो हो लगायतका नाराहरू लगाएका थिए।
