काठमाडौँ । नेकपा (एकीकृत समाजवादी)की नेतृ तथा पूर्वमन्त्री रामकुमारी झाँक्रीले जारी शिक्षक आन्दोलनप्रति कडा असन्तुष्टि व्यक्त गरेकी छन्। सामाजिक सञ्जालमार्फत आफ्ना धारणा सार्वजनिक गर्दै उनले आन्दोलनरत शिक्षकहरू संवादबाट टाढा रहेर अतिवादी अडानमा रहेको आरोप लगाएकी हुन्।

झाँक्रीले लेखेकी छन्, “मैले पनि यो आन्दोलनलाई नजिकबाट नियालेकी छु। यति दिन भयो, आउनु, नाच्नु, गाउनुलाई आन्दोलन मानिएको छ। समस्या समाधानकोतर्फ लाग्नुपर्छ भन्ने लागेर शिक्षक, सरकार र संसदबीच समन्वय गराउने प्रयास गरें। तर उहाँहरू त संवाद नगर्ने रे।”

उनले शिक्षा ऐन संसदमा छलफलको प्रक्रियामा रहेको बताउँदै प्रश्न उठाएकी छन्, “के ऐन सडकबाट पास गर्ने हो? संसद र सरकारको कानुनी प्रक्रिया हुँदैन? समितिमा दफावार छलफल भइरहेका बेला विधेयक पास नभई विद्यालय फर्किन्न भन्ने कुरा लोकतान्त्रिक अभ्यासको अपमान हो।”

पूर्वमन्त्री झाँक्रीले आन्दोलनको नाममा विद्यालय बन्द गर्नु लाखौं विद्यार्थीको भविष्यसँग खेलबाड गर्नु हो भन्दै कडा आलोचना गरिन्। “राज्यको तलब खाने शिक्षकले भर्नाको समयमा विद्यालय बन्द गरेर भविष्य अन्धकारमा पार्न मिल्छ?” भन्ने उनको प्रश्न थियो।

सरकारले शिक्षा ऐन विधिसम्मत प्रक्रियाबाट ल्याउने प्रतिबद्धता जनाइसकेको भन्दै उनले शिक्षकहरूलाई पुनः विद्यालय फर्किन आग्रह गरिन् ।