चन्द्रौटा पुस ४ – शिवराज नगरपालिकामा पौष ५ गते शुक्रबार देखि ९ गतेसम्म आयोजना हुने राष्ट्रपती रनिङ शिल्ड प्रतियोगिताको सम्पूर्ण तयारी पूरा भएको छ।
खेलकुद गतिविधिलाई प्रवर्द्धन गर्दै युवा पुस्तालाई प्रेरित गर्ने उद्देश्यले आयोजना गरिएको यस प्रतियोगितामा नगरपालिकाका १५ वटा माध्यमिक विद्यालयका विद्यार्थीहरूको सहभागिता रहनेछ।प्रतियोगितामा ५० वटा विभिन्न विद्याहरू समावेश हुनेछन्, जसमा ८६६ जना विद्यार्थीले आफ्नो प्रतिभा प्रदर्शन गर्नेछन्। नगर प्रमुख अजय थापाले वर्षभरि नै खेलकुद गतिविधि सञ्चालन गरेर शिवराज नगरपालिकालाई खेलाडी उत्पादनको केन्द्र बनाउने लक्ष्य रहेको बताए।
वडा अध्यक्ष टेकलाल सापकोटाका अनुसार खेलकुद प्रतियोगिताले युवा पुस्तालाई कुलतबाट टाढा राख्न मद्दत गर्नुका साथै उनीहरूलाई खेलकुदमा हौसला प्रदान गरि नगर क्षेत्रमा राम्रो खेलाडी उत्पादन गर्नेछ।
शिवराज नगरपालिकाका शिक्षा साखा प्रमुख पूर्ण बहादुर विश्वकर्माले राष्ट्रपती रनिङ शिल्ड प्रतियोगिताको केही महिनापछि नगरस्तरीय मेयर-उपमेयर कपको तयारी थालिने जानकारी दिए।खेलकुद नगर विकास समितिका संयोजक सन्तोष चौधरीले प्रतियोगिता व्यवस्थापनका लागि जिल्ला स्तरीय प्राविधिक समूह परिचालन गरिने र खेललाई विवादरहित बनाउने प्रतिबद्धता व्यक्त गरे। यस प्रतियोगिताले शिवराज नगरपालिकामा खेलकुदको विकास र युवा पुस्ताको भविष्य निर्माणमा महत्वपूर्ण भूमिका खेल्ने अपेक्षा गरिएको छ।
