कपिलवस्तु टेक्निकल इन्स्टिच्युटमा खेलकुद सप्ताह
कपिलवस्तु टेक्निकल इन्स्टिच्युट, वाणगंगा-२ पिपरामा अध्ययनरत विद्यार्थीहरूको अतिरिक्त क्रियाकलाप अन्तर्गत खेलकुद सप्ताह सुरु भएको छ।
उद्घाटन गरिएको खेलकुद सप्ताहमा एच.ए., फार्मेसी, ल्याब टेक्निसियन संकायका प्रथम, दोस्रो र तेस्रो वर्षमा अध्ययनरत विद्यार्थीहरूको सहभागिता रहेको छ। सप्ताहव्यापी प्रतियोगितामा क्रिकेट, भलिबल, म्युजिकल चेयर डान्स, सटपुट, चेस, लुडो, क्यारमबोर्ड, स्लो साइकल रेस लगायतका विभिन्न खेल समावेश गरिएको छ ।
कार्यक्रमको उद्घाटन गर्दै निजी प्राविधिक शिक्षालय महासंघका केन्द्रीय अध्यक्ष तथा कपिलवस्तु टेक्निकल इन्स्टिच्युटका कार्यकारी निर्देशक अरुण कुमार पाण्डेले विद्यार्थीहरूको सर्वाङ्गीण विकासका लागि अतिरिक्त क्रियाकलापको महत्वपूर्ण भूमिका रहेको बताउनु भयो ।
त्यसैगरी, इन्स्टिच्युटका प्रशासकीय प्रमुख पुनित कुमार मिश्रले खेलकुदले विद्यार्थीहरूमा अनुशासन, टिमवर्क र नेतृत्व क्षमताको विकास गराउने बताउनु भयो ।
इन्स्टिच्युटका प्रिन्सिपल अर्जुन पौडेलले खेलकुद सप्ताह विद्यार्थीहरूको लागि अविस्मरणीय अनुभव बन्ने उल्लेख गर्दै खेलले व्यक्तिगत र सामूहिक सीपको विकासमा टेवा पुराउने धारणा राख्नु भयो ।
कार्यक्रमका संयोजक विक्रम घिमिरेले खेलकुद सप्ताह माघ २० देखि २५ गतेसम्म सञ्चालन हुने बताउदै प्रतियोगिताले विद्यार्थीहरूमा सकारात्मक ऊर्जा भर्नुका साथै उनीहरूको क्षमता अभिवृद्धि गर्न मद्दत पुग्ने बताउनु भयो ।
वि.सं. २०५४ मा स्थापित कपिलवस्तु टेक्निकल इन्स्टिच्युटले एच.ए., फार्मेसी, ल्याब टेक्निसियन, फिजियोथेरापी, अमिन लगायतका कोर्षहरू सञ्चालन गर्दै आइरहेको छ ।
तपाईको प्रतिक्रिया !
सम्बन्धित खबर
