काठमाडौं : सरकारले चालु आर्थिक वर्ष २०८०/८१ को सुरुवाती महिनादेखि नै आन्तरिक ऋण उठाउन थालेको छ।

सरकारले नौ अर्ब चार करोड रुपैयाँ आन्तरिक ऋण प्राप्त गर्न ऋणपत्र जारी गर्न बिहीबार सार्वजनिक आह्वान गरेको छ। नेपाल राष्ट्र बैंकका अनुसार भदौ ३१ गते निष्कासन हुने विकास ऋणपत्र ६ वर्षको हुने छ।

खरिदकर्ताले अनलाइनबाटै ऋणपत्र बोलकबोल पेस गर्न सक्ने केन्द्रीय बैंकले जनाएको छ। बोलकबोलमा बैंक तथा वित्तीय संस्था, गैरबैंक वित्तीय संस्था, बिमा कम्पनी तथा नेपाली नागरिकले भाग लिन सक्नेछन्।

सरकारले नेपाल राष्ट्र बैंकमार्फत अल्पकाल तथा दीर्घकालका लागि आन्तरिक ऋण उठाउने गर्छ।

आर्थिक वर्षको पछिल्ला महिनातिर ऋण उठाउँदै आएकोमा आर्थिक गतिविधिमा शिथिलता आएर राजस्वमा संकुचन आएपछि स्रोत व्यवस्थापनका लागि सुरुको महिनादेखि नै ऋण उठाउनुपर्ने अवस्थामा सरकार पुगेको पुगेको हो।

चालु आर्थिक वर्षमासरकारले दुई खर्ब ४० अर्ब रुपियाँ आन्तरिक ऋण उठाउने लक्ष्य राखेको छ।