एस. आर. सिटी ।
चन्द्रौटा, २४ भदौ ।
कपिलवस्तुको शिवपुरमा विद्यार्थीहरूले सचेतनामूलक र्याली निकालेका छन् ।
नेपाल आदर्श मा.वि. शिवपुरका कक्षा ११ र १२ मा अध्ययनरत विद्यार्थीहरूले लागूपदार्थ, धुमपान तथा मध्यपान विरूद्ध सचेतनामूलक र्याली निकालेका हुन् ।
बिहान ७ बजे विद्यालय प्राङ्गणबाट निकालिएको र्याली दुर्गा कालोनी, नयाँबस्ती, डाँडा, वडा कार्यालय, बेलौती चोक हुँदै पुन: विद्यालयमा आई कोणसभामा परिणत भएको थियो ।
‘धुमपान र मद्यपान निषेध गरौं, बालबालिकालाई लागूपदार्थको सिकार नबनाऔं’, ‘धुमपान बाई-बाई, जीवन हुन्छ हाई-हाई’, ‘स्वस्थ जीवनशैली, सुन्दर भविष्य’ लगायतका नारा सहितको प्लेकार्ड, ब्यानर बोकी ८ सय बढी विद्यार्थीहरू र्यालीमा सहभागी थिए । कार्यक्रममा वडा प्रहरी कार्यालयको समेत सहकार्य रहेको थियो । कार्यक्रममा विद्यालयका प्रधानाध्यापक मुक्तिनाथ पोख्रेलले केही विद्यार्थीहरू पछिल्लो समय कूलततर्फ आकर्षित हुँदा विद्यालय र वरपर समाजको वातावरण धमिलिंदै गएकोप्रति दु:ख ब्यक्त गरे ।
स्वस्थ जीवनका लागि विद्यार्थीहरू गलतको संगत छोड्नुपर्ने प्र.अ. पोख्रेलले जिकिर गरे । “विद्यार्थी र अभिभावकलाई सचेत गराउन सचेतनामूलक कार्यक्रम गरेका हौं”- उनले भने ।
कार्यक्रममा वडा नं. १ का वडाध्यक्ष खिमबिक्रम के.सी., विद्यालय व्यवस्थापन समिति अध्यक्ष नरेन्द्रमान के.सी.सहित विद्यालय पदाधिकारी, सुरक्षाकर्मी, शिक्षक, विद्यार्थी लगायतको उपस्थिति रहेको थियो ।।
