सर्लाही – अख्तियार दुरुपयोग अनुसन्धान आयोगको बर्दिबास कार्यालयको टोलीले सर्लाहीको कौडेना गाउँपालिकामा छापा मारेको छ ।

कोरोना सङ्क्रमितलाई राहत बाँड्नका लागि सङ्घीय सरकारले पठाएको बजेट हिनामिना भएको उजुरी परेपछि अख्तियारको टोलीले आज मङ्गलवार गाउँपालिकाको कार्यालयमा छापा मारेर आवश्यक कागजात नियन्त्रणमा लिएको हो ।

सङ्घीय सरकारले सात सय ४२ कोरोना सङ्क्रमितका परिवारलाई बाँड्न पठाएको ७४ लाख २० हजारमध्ये गाउँपालिकाले १२ लाख रुपैयाँ अन्य शीर्षकमा खर्च गरेको उजुरी परेपछि अख्तियारले छापा मारेको बताएको छ । कोरोना महामारीको समयमा पालिकाले खाद्यान्नसहितको राहत वितरण गर्दा नक्कली बिल बनाएको भेटिएपछि छापा मारिएको अख्तियारले दाबी गरेको छ ।