काठमाडौं- नेपाल निर्माण व्यवसायी महासंघले कोरोना भाइरसको दोस्रोे लहरबाट देशभर संक्रमित भएका बिरामीको उपचारमा देखिएको अक्सिजन अभावले धेरैको ज्यान गएकामा चिन्ता व्यक्त गरेको छ ।
महासंघका महासचिव रोशन दाहालले अक्सिजन अभाव भइरहेको स्थितिमा पुल, हाइड्रो, ट्रस्ट, स्टिललगायत निर्माण कार्य गर्दा वेल्डिङका लागि प्रयोग हुने आफूसँग मौज्दात अक्सिजन सिलिन्डर संक्रमितको उपचारका लागि उपलब्ध गराउन अपिल गरेका छन् ।
त्यस्ता सिलिन्डरूको लगत राखी सम्बन्धित स्थानीय तह, प्रदेश र संघीय सरकारमार्फत नजिकका अस्पताललाई तत्काल उपलब्ध गराई सहयोग गर्न महासंघले आफू मातहतका सम्पूर्ण सदस्य, प्रदेश महासंघ, जिल्ला संघ, एसोसिएट सदस्य तथा वस्तुगत संघलाई अपिल गरेको हो ।
देशभर हाल सञ्चालित साढे ६ हजार परियोजनामध्ये लगभग २ हजारमा अक्सिजन सिलिन्डरको प्रयोग भइरहेको अवस्थामा ती सिलिन्डर कोभिड संक्रमितको उपचारमा प्रयोग गर्न सकिए मानवीय क्षति केही कम गर्न सकिने महासंघको धारणा छ ।
गत वर्ष कोरोना भाइरसको पहिलो लहरबाट मुलुक आक्रान्त हुँदा महासंघले संघीय सरकार तथा प्रदेश सरकारहरूलाई आर्थिक सहयोग गरेको थियो । त्यस्तै, विगतमा भूकम्प, बाढीपहिरोलगायतका प्राकृतिक विपत्तिको समय पनि सहयोग गरेको महासंघले बताएको छ ।
