शिवराज चन्द्रौटा । कपिलवस्तुका होटल व्यवसायीले आफ्नो पेशा व्यवसायलाई स्वस्थकर, स्वच्छ, सफा र मर्यादित बनाउने प्रतिबद्धता जाहेर गरेका छन् । खाद्य प्रविधि तथा गुण नियन्त्रण डिभिजन कार्यालय कपिलवस्तुको आयोजना र होटल तथा रेष्टुरेन्ट व्यवसायी संघ कपिलवस्तुको समन्वयमा सम्पन्न दुई दिवसीय खाद्य स्वच्छता विषयक अभिमुखीकरणका सहभागीले यस्तो बाचा गरेका हुन् ।
अभिमुखीकरणको समापनको अवसरमा होटल तथा रेष्टुरेन्ट व्यवसायी संघका जिल्ला अध्यक्ष गोपाल बहादुर के.सी.ले होटल व्यवसाय केवल आर्थिक उपार्जनका लागि मात्र नभई सरसफाई, खानाको शुद्धता, स्वस्थकर र व्यवसायलाई मर्यादित रुपमा संचालन गर्न सुझाव दिए । उनले होटल व्यवसायमार्फत समग्र जिल्लाको पर्यटन प्रवद्र्धनमा समेत ठूलो टेवा पु¥याउँदै आएको उद्घोष गरे ।
त्यसैले होटल व्यवसायको माध्यमबाट जिल्लाकै पहिचान जोगाउन सबैले अहम भूमिका खेल्नुपर्नेमा समेत जोड दिए । यता होटल तथा रेष्टुरेन्ट व्यवसायी संघका वरिष्ठ उपाध्यक्ष लेखनाथ घर्तीले दुई दिनसम्म सिकेका सीपलाई व्यवहारमा अवलम्बन गर्दै व्यवसायमा कुनै पनि किसिमको आँच आउने जस्ता गतिविधिमा लाग्न नहुनेमा जोड दिए । समापनको अवसरमा होटल व्यवसायी संघ शिवराज नगर इकाई अध्यक्ष विष्णु प्रसाद पोख्रेलले सिकेका सीपलाई व्यवहारमा लागू गर्न सके मात्र तालिमको सार्थकता रहने विश्वास व्यक्त गरे ।
अभिमुखीकरण सहजीकरणका क्रममा खाद्य प्रविधि तथा गुण नियन्त्रण कार्यालय भैरहवा, रुपन्देहीका कार्यालय प्रमुख बिमल कुमार दाहालले होटल, रेष्टुरेन्ट तथा क्यान्टिन संचालकले खाद्य पदार्थको स्वच्छतामा विशेष ध्यान दिनुपर्नेमा जोड दिएका थिए । साथै उनले आजकल खाद्य पदार्थमा विभिन्न किसिमका मिसावट गरेको भेटिने हुँदा यस्ता गलत धन्दामा नलाग्न होटल व्यवसायीहरुलाई सुझाव दिए ।
यता खाद्य प्रविधि तथा गुण नियन्त्रण डिभिजन कार्यालय कपिलवस्तुका प्रमुख तथा तालिम संयोजक शिवशंकर मिश्रले खाद्य पदार्थको शुद्धतासँगै सरसफाइ र गुणस्तरमा ध्यान दिनुपर्ने सुझाव दिए । कार्यक्रमलाई सहजीकरण गर्दै उनले खाद्य पदार्थमा मिसावट र केमिकल, विषादीको असरका साथै खाद्य स्वच्छताका लागि त्यस सम्बन्धी नीति नियम र तरिकाबारे प्रत्याएका थिए ।
जिल्लाको चन्द्रौटास्थित होटल के–लियोको सभाहलमा संचालन भएको दुई दिने अभिमुखीकरणमा जिल्लाको विभिन्न स्थानमा होटल तथा रेष्टुरेन्ट व्यवसाय संचालन गर्दै आएका व्यवसायीहरुको सहभागिता रहेको थियो ।
