प्रधानमन्त्री केपी शर्मा ओलीले ऊर्जा, जलस्रोत तथा सिंचाई मन्त्री बर्षमान पुनलाई सचेत गराउनु भएको छ । नेपाल बिद्युत प्राधिकरणका तात्कालिन कार्यकारी निर्देशक कुलमान घिसिङको बिषयमा उर्जामन्त्री पुनको फट्याईंलाई लिएर प्रधानमन्त्री ओलीले असोज ५ गतेको मन्त्रिपरिषद बैठकमा सचेत गराउँदै हप्काउनु भएको हो ।
बिद्युत प्राधिकरणमा कुलमानलाई जसरी पनि हटाउने र म्याद थप नगर्ने निर्णयमा रहनुभएका मन्त्री पुनले चार बर्षे कार्यकाल सकिने बेलासम्म कुनै प्रस्ताव नल्याए पनि प्रधानमन्त्री ओलीमाािथ दोष थोपर्नुभएको थियो । भदौ ३१ गते विद्युत प्राधिकरणका कार्यकारी निर्देशक घिसिङको ४ बर्षे कार्यकाल सकिंदै थियो । सामाजिक सञ्जालदेखि सडकबाट समेत घिसिङको पुनर्नियुक्ति हुनुपर्ने पक्षमा लबिङ भइरहेको थियो । तर ऊर्जामन्त्री पुनले घिसिङलाई प्राधिकरणको कार्यकारी निर्देशकमा म्याद थपको प्रस्ताव मन्त्रिपरिषदमा लैजानुभएन । तर दोष भने प्रधानमन्त्रीमाथि थोपर्न लगाउनु भयो ।
आफ्ना सचिवालयमार्फत उहाँले घिसिङको पुनर्नियुक्तिका लागि ऊर्जा मन्त्रालयबाट प्रस्ताव लगेको तर प्रधानमन्त्री ओलीले रोकेको औपचारिक धारणा स्वकीयसचिवलाई फेसबुकमार्फत सार्वजनिक गर्न लगाउनु भयो । ऊर्जा मन्त्रालयबाट यस बिषयमा कुनै प्रस्ताव नै नलगी लगेको भनेर प्रधानमन्त्री ओलीले नियुक्ति रोकेको प्रचार गराएपछि मन्त्री पुनले असोज ५ गते बसेको मन्त्रिपरिषद बैठकमा नराम्रोसँग हप्की खानुपरेको हो । जनताटाइम्स डटकमले मन्त्री पुनको सचिवालयबाट धारणा आएलगत्तै प्रस्ताव नै नगली प्रधानमन्त्रीबिरुद्ध जनता भडकाउन यस्तो काम भएको तथ्य सार्वजनिक गरेको थियो ।
यसरी सोझै फट्याई गरेको तथ्य प्रमाणित भएपछि मन्त्री पुनले बैठकमै गल्ती भयो हजुर भन्दै माफी माग्नुपरेको छ । एक मन्त्रीले जनताटाइम्सलाई दिएको जानकारीअनुसार बैठकमा प्रधानमन्त्री ओलीले मन्त्री पुनलाई कुलमानको बिषय उठान गर्दै ‘मन्त्रीजी कहिले ल्याउनुभयो कुलमानको प्रस्ताव’ भन्दै सचेत गराउनु भएको हो । प्रधानमन्त्रीले सचेत गराउनुका साथै कडा रुपमा हप्काएपछि मन्त्री पुनले आफ्नो सचिवालयबाट गल्ती भएको भन्दै क्षमायाचना गर्नुभएको ती मन्त्रीले जनताटाइम्सलाई बताए ।
आफूले कुलमान नियुक्तिको प्रस्ताव लगेको कुरा भन्दै नभनेको तर सचिवालयबाट त्यस्तो आसयको कुरा बाहिरिएको भन्दै मन्त्री पुनले आफ्नो गल्ती स्वीकार गर्नुभएको हो । मैले भनेको नै थिएन, तर सचिवालयबाट गल्ती भयो, अव आइन्दा यस्तो गल्ती हुन्न प्रधानमन्त्रीज्यू, क्षमा पाऊँ, बैठकमा मन्त्री पुनको क्षमायाचना उल्लेख गर्दै ती मन्त्रीले भने ।
साभार: जनता टाइम्स
