कपिलवस्तु,
उच्च अदालत तुलसीपुर बुटवल ईजलासले तौलिहवामा निर्माण सुरु गरिएको हुलाकी सडकको काम न रोकना आदेश दिएको छ । हुलाकी सडक आयोजना कपिलवस्तुले एक साताको समयसीमा दिएर गत साउन ३ गतेबाट सडक अतिक्रमण गरि बनाईएका संरचना हटाउन सुरु गरेपछि त्यसविरुद्ध ३ जनाले निषेधाज्ञा उत्प्रेषण र परमादेशका लागि गत साउन ५गते रिट दायर गरेका थिए ।
स्थानीय कालीपद शर्मा, रोहित उपाध्याय र सुरेश शर्माले हुलाकी सडक आयोजना, प्रशासन कार्यालय र कपिलवस्तु नगरपालिकामाथि सो काम रोक्का हुन पर्ने माग गर्दै रिट दायर गरेका थिए । रिटमा न्यायाधीश बावुराम रेग्मीको ईजलासले साउन ५ गते अल्पकालीन परमादेश जारी गर्दै साउन १२ गते दुबै पक्षलाई छलफलका लागि अदालतमा बोलाएको थियो ।
सोही बिषयमा सोमवार पक्ष र बिपक्षका कानुन ब्यवसायीहरुको प्रमाण र बहास पछि गत साउन ५ गते दिईएको अल्पकालीन आदेशलाई निरन्तरता दिनु नपर्ने आदेश जारी भएको कपिलवस्तु नगरपालिकाका कानुनी सल्लाहकार हुमबहादुर कुँवरले जानकारी दिनुभयो ।
न्यायाधीशद्धय बावुराम रेग्मी र केशवराज जोशीको संयुक्त ईजलासले सो ओदेश गरेका हुन । सडक ऐन २०३१ अनुसार हुलाकी राजमार्गको मापदण्ड तोकिएको, २०३१ भन्दा अघि निर्माण भएका संरचनालाई क्षतिपूर्ति दिने र घरबारबिहीन भएकालाई बसोबासको ब्यवस्था गर्नु भनी गत असार २५ गते प्रशासन कार्यालयमा निर्णय भएका अदालतको आदेशमा भनिएको छ ।
आधिकारिक निकायबाट भएको निर्णय सदायसताका साथ कार्यान्वयन हुन्छ भनी बिश्वास गर्नु पर्ने र रिट निवेदनमा उठाईएका अन्य बिषय अन्तिम आदेश हुँदाका बखत सम्बोधन नै हुने आदेशमा उल्लेख गरिएको छ ।
रिट निबेदनको पक्षबाट अधिवक्ता हीमलाल न्यौपाने, बिपक्षी कपिलवस्तु नगरपालिकाको तर्फबाट बरिष्ठ अधिवक्ता कमलराज जोशी र शालिकराम बन्जाडे सहायक न्याययाधीवक्ता धर्मराज जोशीले बहस गरेका थिए ।
अदालतको सो आदेशसंगै अब हुलाकी सडक निर्माणका लागि बाटो खुला भएको कपिलवस्तु नगरपालिकाका मेयर किरण सिंहको प्रतिक्रिया छ । उहाँले अब हुलाकी राजमार्ग आयोजनासंग समन्वय गरी सडक निर्माणको काम अघि बढाईने बताउनुभयो । अहिले तौलिहवा सडक क्षेत्रमा बनाईएका संरचनाहरु धमाधम हटाइएको छ । तौलिहवाको जमुहार टोलदेखि छोटकी तौलिहवाको मस्जिद सम्म २३ सय ४० मिटरमा २ सय ७३ वटा संरचना सडक क्षेत्रमा छन । यस्तै जमुहारदेखि भवानी भिक्षुसम्म भने ५ सय ७३ वटा संरचना सडकमा परेको कपिलवस्तु नगरपालिकाले जनाएको छ ।
