काठमाडौं
राष्ट्रिय जनमोर्चाले संसदको राज्य व्यवस्था समितिबाट पारित बैवाहिक अंगिकृत नागरिकता सम्बन्धी सात वर्षे प्रावधानलाई स्वागत गरेको छ । तर, विदेशी बुहारीले सम्बन्धित देशको नागरिकता त्याग गरेपछि मात्रै नेपालको नागरिकता दिनुपर्नेमा राजमोले जोड दिएको छ ।
सोमबार अध्यक्ष चित्रबहादुर केसीले एक वक्तव्य प्रकाशित गरी नेपाली महिलासँग विवाह गर्ने पुरुषलाई भने नेपालको नागरिकता दिन नहुनेमा जोड दिनुभएको छ । खुला सिमाना र विदेशीसँग विवाह गर्ने प्रचालनका कारण खुकुलो नागरिकता नीति अपनाउँदा त्यसले राष्ट्रियतामाथि गम्भीर असर पर्ने अध्यक्ष केसीद्वारा प्रेसित वक्तव्यमा उल्लेख छ ।
यस्तो, छ वक्तव्य
१) राज्य व्यवस्था समिति तथा नेकपाको सचिवालयले समेत नेपाली नागरिकसित विवाह गर्ने विदेशी महिलालाई विवाहको तुरुन्तै ६ महिनापछि अंगीकृत नागरिकता दिन सक्ने व्यवस्था हटाई ७ वर्षपछि मात्र अंगीकृत नागरिकता दिन सक्ने जुन प्रस्ताव पारित गरेको छ, त्यसलाई राष्ट्रिय जनमोर्चाले स्वागत गर्दछ र संसदद्वारा त्यसलाई पारित गर्नुपर्ने आवश्यकतामा जोड दिन्छ ।
२) तर कुनै विदेशी महिलाले आफ्नो पहिलेको देशको नागरिकता हटाउन प्रक्रिया शुरु गरेपछि नागरिकता दिन सक्ने जुन प्रकारको अवधारणा राखिएको छ, त्यसको हाम्रो पार्टीले विरोध गर्दछ । सम्बन्धित देशको नागरिकता त्याग्न प्रक्रिया शुरु गरेपछि मात्र होइन, त्यो देशको नागरिकता त्यागेपछि मात्र अंगीकृत नागरिकता दिन पर्ने आवश्यकतामा हामीले जोड दिन्छौँ ।
३) नेपाली महिलासित विवाह गर्ने कुनै पनि विदेशी पुरुषलाई वैवाहिक आधारमा नागरिकता दिनु पर्छ भन्ने सोचाईलाई हामीले गलत मान्दछौँ र त्यसको दृढतापूर्वक विरोध गर्दछौँ । हाम्रो जोड यो कुरामा छकि, नेपाल जस्तो तीनतिर खुला सीमा भएको भु–परिवेष्ठित देशले नागरिकता सम्बन्धी नीतिलाई एकदम कडा गराउनु पर्ने आवश्यकता छ । त्यसकारण त्यसलाई खुकुलो पार्दै लैजाने नीति देशको राष्ट्रियता र सार्वभौमिकताका विरुद्ध भएकाले त्यसप्रकारको नीतिलाई प्रश्रय नदिनका लागि हामीले सम्पूर्ण नेपाली जनता तथा सबै देशभक्त शक्तिहरुको गम्भीर ध्यानाकर्षण गर्न चाहन्छौँ ।
४) यही असार ९ गते ११ दलका तर्फबाट एमसिसीका विरुद्ध काठमाडौँमा संयुक्त विरोध प्रदर्शन गर्ने निर्णय भएको छ । त्यो दिन देशका अन्य भागहरुमा पनि त्यही विषयमा विरोध प्रदर्शन गर्ने समझदारी भएको छ । अन्य पक्षहरुको संगठन भएका जिल्लाहरुमा उनीहरुसित मिलेर वा अन्य पक्षहरुसित त्यसप्रकारको संयुक्त कार्यक्रम बन्न नसकेमा आफ्ना तर्फबाट पनि उक्त विरोध कार्यक्रमको आयोजना गर्नका लागि हामीले पार्टीका सबै समिति, सदस्य र समर्थकहरुसित अनुरोध गर्दछौँ । एमसिसीका विरुद्धका उक्त कार्यक्रमहरुलाई सफल पार्नको लागि हामीले सम्पूर्ण जनतासित अपील गर्दछौँ ।
