दिपक के.सी.कपिलवस्तु

कपिलवस्तुको विजयनगर गाउँपालिका अध्यक्ष गोपाल थापाको दिनचर्या अहिले फेरिएको छ । विश्वभरी फैलिएको कोभिड १९ कोरोनाको संक्रमण रोकथाममा थापाले नयाँ कामहरुको थालनि गरे संगै उनको दैनिकीमा पनि परिर्वतन आएको हो ।

गाउँपालिका अध्यक्षले पाएको चारपांग्रे सवारीको सुविधालाई छोड्दै अध्यक्ष थापा अहिले आफ्नै निजि स्कुटरमा जनताको सेवामा गाउँघरमा पुग्ने गरेका छन ।
कोरोना रोकथाममा स्थानिय इलाका प्रहरी कार्यालय गणेशपुरलाई सक्रिय बनाउन खुल्ला सिमा बाट हुने घुसपैठलाई रोक्न अध्यक्ष थापाले आफुले सुविधा लिदै आएको गाउँपालिकाको सवारी प्रहरी परिचालनमा दिएका छन । इप्रका गणेशपुरमा एक वटा प्रहरी कै सवारी साधन भए पनि कोरोना महामारीको समयमा प्रदान गर्नु सुरक्षा सर्तकतालाई ध्यान दिदै थापाले आफु चढ्ने सवारी प्रहरी परिचालनमा दिएको बताए ।

प्रहरीलाई विभिन्न घटना स्थलमा पुग्न र सिमामा हुने घुस पैठ रोक्न सवारी अभाव भए पछि आफु चढ्ने सवारी साधन नै प्रहरीलाई प्रयोग गर्न दिएको उनले बताए ।
भारतिय सिमा संग जोडिएको गाउँपालिकाको २८ किमि खुल्ला सिमा पर्दछ । सोहि खुल्ला सिमा सुरक्षा गर्न र सिमाबाट लुकिछिपी प्रवेश गर्नेहरुलाई नियन्त्रणमा लिई क्वारेन्टाइनमा राख्न गाउँपालनलिकाले विहिबारबाट ५० जना नगर प्रहरी परिचालन गरेको गाउँपालिका प्रमुख प्रशासकिय अधिकृत गोविन्द भटट्राईले बताए । नगर प्रहरीले सिमा सुरक्षा सगै क्वारेन्टाइनको पनि सुरक्षा गर्ने उनले बताए ।
नगर प्रहरीले गाँउपालिकाको सबै नागरिकको घरघरमा पुगेर उनीहरुको स्वास्थ्य अवस्थाबारे जानकारी संकलन गर्ने ,कोरोना सम्बन्धि जनचेतना फैलाउने काम गर्ने गाउँपालिका अध्यक्ष थापाले बताए ।

“आजभोलि दैनिक क्वारेन्टाइनको अनुगमन, सुरक्षा निकाय, स्वास्थ्य शाखा संगको छलफलमा र गाउँपालिका बासीहरुको अवस्थाका बारेमा बुझ्दा नै दिन वित्नेगरेको छ” अध्यक्ष थापाले भने । विशेष खुल्ला सिमाका कारण लुकी छिपी प्रवेश गर्ने हुदाँ सिमामा निगरानी कडाइ गर्नु परेको उनले बताए ।
गाउँपालिकाले अहिलेको अवस्थामा स्थानिय नागरिकहरुका लागी लागी निशुल्क एम्बुलेन्स सेवा दिदै आएको छ ।

विरामीहरुका लागी अहिले दिगो विकास युवा क्लबको एम्बुलेन्स गाउँपालिकाले लिएर निशुल्क सुविधा दिदै आएको अध्यक्ष थापाले बताए । “गाउँपालिकामा रहेका दिर्घ रोगीहरुको डाटा संकलनको काम भइरहेको छ, उनीहरुले सेवन गर्ने औषधी निशुल्क वितरण गर्ने योजनामा छौं” उनले भने ।
गाउँपालिकाले विपत व्यवस्थापन कोषमा डेढ करोड रकम छुट्याएको र सोहि रकमबाट क्वारेन्टाइन व्यवस्थापन, स्वास्थ्य सामाग्री खरिद र राहत वितरण गर्दै आएको अध्यक्ष थापाले बताए ।

कोरोना भाइरसका कारण भएको लकडाउनका कारण पहिलो र दोस्रो चरणमा गरी २३ सय विपन्न गरिब घर परिवारलाई राहत वितरण गरिसकेको र अब तेस्रो चरण १२ सय घर परिवारलाई राहत वितरणको तयारी भएको उनले बताए । सिमा संग जोडिएको गाउँपालिकाले भएकाले जोखिम पनि बढि नै हुने हुदाँ गाउँपालिकाले ४ वटा क्वारेन्टाइन व्यवस्थापन गरी त्यहाँ रहेका १ सय २१ जनाको नियमित स्वास्थ्य चेकजाँच गर्दै आएको छ ।