धनगढी, असोज १। कैलालीको गोदावरी नगरपालिका–१ मा रहेको नेकपा एमालेका सचिव तथा पूर्वमन्त्री लेखराज भट्टको घर जलाउने घटनामा एमाले र राप्रपाका नेताहरूको संलग्नता रहेको तथ्य बाहिर आएको छ। उक्त घटनामा एक सरकारी कर्मचारी समेत सहभागी रहेको पाइएको छ।

भदौ २४ गते जेन्जी आन्दोलनमा घुसपैठ गरी भट्टको घरमा आगजनी गरिएको उहाँका भाइ गोकर्ण भट्टले जानकारी दिनुभयो। उनका अनुसार दुईवटा घर, ट्याक्टर, अन्न तथा लत्ताकपडामा आगजनी गरिनुका साथै लुटपाट पनि गरिएको थियो।

उहाँले भाउजूको २२ तोला सुनका गरगहना, तीन लाख नगद र अन्य जिन्सीसहित पाँच करोडभन्दा बढीको क्षति पुगेको बताउनुभयो। भट्टले ३० वर्षभन्दा माथिका व्यक्तिहरू आन्दोलनकारीको नाममा तोडफोड, लुटपाट र आगजनीमा संलग्न भएको उल्लेख गर्नुभयो।

‘दाजुको घरमा भएको लुटपाट तथा आगजनीमा नेकपा एमाले कैलाली जिल्ला लेखा समितिका सदस्य बालकृष्ण भट्टराई, राप्रपाका स्थानीय नेता दुर्गा पोखरेल र कृषि सामग्री कम्पनी लिमिटेड धनगढीका हलुका सवारी चालक बामदेव अवस्थी संलग्न रहेको हामीले पहिचान गरिसकेका छौँ,’ उहाँले भन्नुभयो।

यस्तै, स्थानीय युवा रोहन बिष्टले घटनाको भिडियो खिच्दै लुटपाट र आगजनी गरेको देखिएको उहाँले जानकारी दिनुभयो।

यसै समूहले गोदावरी नगरपालिकाका मेयर वीरेन्द्र भट्टको घरमा पनि लुटपाट र आगजनी गरेको जनाइएको छ।