चन्द्रौटा, कपिलवस्तु
कपिलवस्तुको शिवराज नगरपालिकाले आर्थिक रूपमा कमजोर वर्गका गर्भवती महिलाका लागि निःशुल्क प्रयोगशाला जाँच तथा भिडियो एक्स–रे सेवा सुरु गरेको छ। चालु आर्थिक वर्ष २०८२/०८३ को नीति, बजेट र कार्यक्रममा समावेश गरी यो सेवा सञ्चालन गरिएको छ । यसअघि नै नगरपालिकाले प्रसूति सेवाका लागि निःशुल्क एम्बुलेन्स सेवा पनि प्रदान गर्दै आएको थियो ।

सेवा पहुँचका लागि गर्भवती महिलाले कम्तीमा ४ पटक नियमित रूपमा गर्भ जाँच गराउनु आवश्यक सर्त रहेको स्वास्थ्य शाखा प्रमुख चुडामणि भट्टराईले जानकारी दिनुभयो ।

नगरपालिकाका स्वास्थ्य शाखा प्रमुख भट्टराईले नगरभित्रका ४ स्वास्थ्य संस्थामार्फत सेवा प्रदान भइरहेको र आधारभूत स्वास्थ्य सेवा अस्पतालमा प्रयोगशाला जाँचसँगै भिडियो एक्स-रे सेवा उपलब्ध हुने एवम् शिवपुर, चनई र शिवगढी स्वास्थ्य चौकीमा प्रयोगशाला परीक्षण सेवा सञ्चालनमा निशुल्क हुने बताउनुभयो ।

भट्टराईका अनुसार हेमोग्लोबिन, प्रोटिन, एल्बुमिन, सुगर, युरिक एसिड र रक्तचाप लगायतका परीक्षणहरू निःशुल्क रूपमा व्यवस्था गरिएको र थप सेवा विस्तार गरिने बताउनुभयो ।

नगरप्रमुख अजय थापाले स्वास्थ्यलाई पहिलो प्राथमिकतामा राख्दै सेवा विस्तार गरिएको बताउनु भयो । जनताको स्वास्थ्य नै हाम्रो पहिलो प्राथमिकता भएको थापाले बताउनुभयो । प्रभावकारी र पहुँचयोग्य सेवा सबैको घरदैलोमा पुर्‍याउने लक्ष्य रहेको समेत थापाले बताउनु भयो । थापाले वृद्धवृद्धा तथा अशक्त नागरिकलाई घरमै पुगेर रक्तचाप लगायतका आधारभूत स्वास्थ्य परीक्षणसमेत प्रदान गरिँदै आएको जानकारी दिनुभयो ।