दिपक खड्का,चन्द्रौटा कपिलवस्तु ।

शिवराज नगरपालिकाले शिक्षामा सबै बालबालिकाको पहुँचकालागि छात्रवृत्तिमा कार्यक्रमलाई शिघ्र सञ्चालन गर्न शैक्षिक सत्रको सुरुवातमा पहल चालेको छ । शिवराज नगरपालिकाका नगर प्रमुख अजय थापाले छात्रवृत्ति कार्यक्रम सञ्चालनले न्युन आय भएका अभिभावकहरुलाई राहत पुग्ने र आर्थिक अवस्था कमजोर भएका परिवारले पनि समान अवसर प्राप्त गर्ने बताउनु भयो ।

शिवराज नगरपालिकाले नगरपालिका क्षेत्रभित्र सञ्चालनमा रहेका सबै संस्थागत विद्यालयलाई शैक्षिक सत्र २०८२ का लागि छात्रवृत्ति वितरणसम्बन्धी विवरण जेठ २५ गते भित्र विवरण पेश  गर्न अनुरोध गरेको छ । नगरपालिकाको शिक्षा,युवा तथा खेलकुद शाखा मार्फत जारी सूचनामा भनिएको छ कि छात्रवृत्ति वितरण प्रक्रिया संस्थागत विद्यालय छात्रवृत्ति वितरण कार्यविधि,२०७४ बमोजिम अघि बढाइएको छ । सो कार्यविधिको परिच्छेद ४, दफा ४.२.१ अनुसार विद्यालय तहमा गठन गरिने छात्रवृत्ति व्यवस्थापन समितिले विद्यार्थी छनोट गर्दा निश्चित आरक्षण कोटा सुनिश्चित गर्नुपर्नेछ। छात्रवृत्ति वितरणका लागि नगरस्तरीय समितिले मिति २०८२ जेठ ८ गते गरेको निर्णयअनुसार, छात्रवृत्तिका लागि प्रतिशत निर्धारण समेत गरेको सूचनामा जनाइएको छ ।

नगरपालिकाले सबै वडा कार्यालयहरूलाई आ–आफ्नो वडाभित्रका विद्यालयहरूको छात्रवृत्ति व्यवस्थापन समितिमा सहभागी भई आवश्यक सहजीकरण र समन्वय गर्न निर्देशन दिएको शिवराज नगरपालिकाका उप-सचिव पूर्ण बहादुर विश्वकर्मा द्वारा हस्ताक्षरित सूचनामा जानकारी दिएको छ ।

विश्वकर्माले छात्रवृत्ति प्रकियालाई पारदर्शिता, समावेशिता र समान अवसरको प्रत्याभूति गर्न सबै विद्यालय र सरोकारवालाहरूको सक्रिय सहभागिताका लागि पहल गर्न आग्रह गर्नु भयो।